En xuño de 2017 o goberno municipal de Teo conformado por Son de Teo/Anova e PSOE segue sen aprobar os orzamentos para este exercicio, con todo o que iso implica para os veciños e veciñas de Teo que unha vez máis vén demorada a atención ás necesidades fundamentais como son as actuacións en servizos básicos (saneamento e abastecemento de aguas) e a seguridade viaria.

Diante desta situación, o portavoz municipal do BNG en Teo, Manuel Anxo Fernández Baz, “insta ao goberno do señor Sisto e da señora Lemus a que presenten as contas para 2017 tendo en conta que estamos rematando o segundo trimestre do ano.” E engade que, “o BNG non ten constancia de ningunha proposta de contas, nin do plan de axuste que teñen que elaborar e aplicar polo erro nas contas de 2016, primeiro orzamento do goberno de Son de Teo/Anova e PSOE.” Cando xa transcorreu a metade do ano 2017, e tendo en conta que temos un goberno municipal con maioría absoluta e no que de nove concelleiras/os, seis teñen salario do Concello, reclamamos unha resposta sobre as contas para 2017, tendo claro que a única resposta aceptable é o proxecto de orzamentos e o plan de axuste.”

O portavoz nacionalista pon de manifesto que “o máis preocupante para o BNG é que o atraso na aprobación das contas supón pospoñer actuacións imprescindíbeis para os veciños e veciñas de Teo como son continuar co saneamento e o abastecemento de augas, dando cumprimento aos compromisos coa veciñanza, e seguir poñendo en marcha medidas en materia de seguridade viaria, ámbito no que o BNG segue reclamando a execución da moción aprobada en 2013 para dotar a Teo dun plan de seguridade viaria que represente o marco para transformar un concello que necesita un proxecto e actuacións contundentes nesta materia.”

En consecuencia, o portavoz municipal do BNG, Manuel Anxo Fernández Baz, demándalle ao alcalde “responsabilidade”, e reclámalle “que se poña a traballar polos veciños e veciñas e que presente os orzamentos para 2017.”