Todas as emendas parciais presentadas polo BNG de Teo aos orzamentos da Xunta para 2021 foron rexeitadas no Parlamento galego polo Partido Popular que segue a darlle as costas á veciñanza.

As emendas propostas son as seguintes:

-Construción dun centro de día. É unha das principais demandas en Teo polas necesidades de atención e de conciliación e porque o centro público de referencia está en Urdilde.

-Cumprir o acordo unánime no Parlamento galego a iniciativa do BNG para rematar a parcelaria nas parroquias de Lampai, Luou, Rarís, Lucí, Oza, Teo, Bamonde e Vilariño.

-Incrementar a seguridade viaria e as medidas de humanización da AC-841 desde Cacheiras até Pontevea, unha estrada autonómica que en Teo é unha travesía urbana.

O portavoz municipal do BNG, Manuel Barreiro, reclámalle ao PP “que deixe de discriminar ao noso concello e cumpra os acordos parlamentares, as nosas propostas son necesidades veciñais, levamos dende 2009 pedindo o centro de día que Feijóo quitou á veciñanza de Teo cando xa estaba para iniciar o proceso de licitación. Rematar a concentración parcelaria forma parte dun acordo adoptado por unanimidade no Parlamento galego hai dous anos, a iniciativa do BNG”, e engadiu, “a respecto da humanización da AC-841, calquera que teña que transitar por ela dáse conta que require unha actuación que incida na seguridade e na humanización da vía”.

Finalmente Barreiro reclamou investimentos para un concello que limita coa capital do país e ten case 20 000 habitantes que é permanentemente mangoneado polo Partido Popular, veñen facer fotos na Pontevea e pedir o voto, nada máis.

En definitiva, o BNG de Teo non deixará de pedir as melloras e investimentos que exixe a cidadanía de Teo.