#notaPrensa

O BNG de Teo inaugura en Cacheiras un local aberto á veciñanza

 

A portavoz municipal, Patricia Castelao, participará no acto de apertura que terá lugar este venres ás 20.30 horas

 

Teo, 14 de xullo de 2022.- Como unha "casa aberta" á veciñanza presenta o BNG de Teo o novo local que este venres inaugura en Cacheiras. A portavoz municipal, Patricia Castelao, e a responsábel de organización da executiva da formación nacionalista, Lucía López Sobrado, participarán no acto de apertura ao que convidan á veciñanza do concello.

O BNG de Teo inaugurará este mesmo venres un local amplo, luminoso, a rente de rúa e aberto a veciñanza que ten como obxectivo converterse, segundo apuntan, "nun espazo de referencia e encontro non só para a militancia senón para todas as veciñas e veciños de Teo".

O local está situado nun baixo da travesía de Cacheiras, un espazo privilexiado, moi transitado, céntrico e de fácil acceso desde todo o territorio do concello. "Buscabamos que a propia ubicación fose tamén accesíbel, que estivese a man de quen quixese achegarse e participar da actividade como achegar suxestións ou preocupacións con respecto ao concello", apunta a portavoz municipal, Patricia Castelao.

 

Proceso de consulta para unha alternativa necesaria

 

O novo espazo que o BNG abrirá este venres cun convívio festivo será tamén un lugar clave para o proceso participativo e de diálogo coa veciñanza que a formación nacionalista inicia de cara as eleccións municipais que se celebrarán o próximo ano. "O BNG quere coñecer de primeira man os problemas, os proxectos e os desexos dos veciños e veciñas. Interésanos a opinión da xente para elaborar o noso programa, para a nosa acción municipal e para apostar por iniciativas que melloren a vida das teenses", explica Patricia Castelao que convida ás persoas que residen no concello a facer as súas achegas e trasladar as súas preocupacións á formación nacionalista.

"O BNG caracterizouse sempre por saber escoitar, por preguntar e por tratar de solucionar os problemas que afectan ás persoas en Teo. O local é un paso adiante, a apertura dun espazo que contribuirá a que todo este proceso sexa máis fácil", explica Patricia Castelao que destaca tamén a cómoda situación das novas instalacións, moi a man para as parroquias do concello.

Ademais da propia actividade política da organización nacionalista que consigue co novo espazo un local para a celebración de asembleas e reunións, o BNG considera que este local será tamén un "lugar aberto para encontros e debates, para presentacións e entrevistas, para que as persoas que traballan por un Teo mellor teñan posibilidade de acceder a un local cómodo e en condicións".

 

Expectativas para as municipais

 

A portavoz municipal, Patricia Castelao, apunta ademais a que a apertura do novo local responde tamén "ás expectativas que temos de cara ás próximas eleccións municipais nas que queremos ofrecer unha ferramenta con garantías e imprescindíbel para a mellora do concello e da vida de todas as persoas que o habitamos". "Somos a alternativa real, unha forza en crecemento a nivel galego e municipal que precisa, tamén por esta razón, un espazo digno para o desenvolvemento deste proceso de encontro e diálogo que xa avanzamos nestes tres anos mais que queremos intensificar para que boa parte da veciñanza participe no noso proxecto, que está aberto a todas e todos", apunta Castelao.

O BNG aposta pola municipalización da recollida e a compostaxe dos RSU - Teo, 31 de maio de 2022-

É sorprendente que o Goberno Municipal de Teo, Son de Teo, agardase a que faltasen só dous meses para finalizar a concesión da recollida do lixo, para abrir este debate sobre a posible municipalización do servizo. Este comportamento reflicte unha falta de previsión e de eficacia preocupante e reiterada de Goberno Municipal, até hai pouco en coalición co PSOE e agora en solitario.

Entendemos que o sistema de recollida debe de ir vinculado ao modelo de tratamento dos mesmos. Por iso é o momento de abrir un debate sobre estes dous aspectos, xa que segundo os obxectivos e criterios do tratamento haberá que facer a recollida.

No BNG, como criterio xeral, apostamos por un servizo de recollida municipalizado, e polo modelo das 3R (redución, reciclaxe e reutilización), tendo a compostaxe caseira e comunitaria como cerne do mesmo, obxectivos que con Sogama non se están a conseguir.

Neste momento, xa existen moitos concellos na Galiza que están traballando nesta liña. O plan Revitaliza da Deputación de Pontevedra, as experiencias de Allariz e Carballo... poden servir modelos a estudar e a implementar en Teo.

Isto permitiría adecuarse xa á nova Lei 7/2022 de abril de residuos e solos contaminados para unha economía circular, na que xa se prohibe a incineración dos residuos.

Outro aspecto a ter en conta é a posibilidade de participar en proxectos comarcais para mellor rendibilizar os servizos.

Asi mesmo, para o BNG é fundamental a implicación da cidadanía neste novo modelo, e isto conséguese únicamente con moita información e creando espazos de participación.

O BNG esixe medidas urxentes para poñer fin á ameaza que pesa sobre Casalonga

 

A voceira nacionalista, Patricia Castelao, pide explicacións sobre o cambio de titularidade a nome de Toysal da pista que leva á canteira e esixe que se estude todas as posibilidades abertas

 

Reclama un "pacto municipal" para sumar forzas contra a instalación do vertedoiro

 

Teo, a 13 de maio de 2022.- O BNG denuncia que, en lugar de alonxar a ameaza do vertedoiro, as novas informacións como o cambio de titularidade da pista abren novas portas para facilitar a súa instalación á empresa Toysal. A portavoz, Patricia Castelao, reclamará ao goberno municipal que estude todas as posibilidades abertas para bloquear definitivamente o proxecto de vertedoiro e pide explicación sobre o cambio de titularidade da pista a nome de Toysal ademais de defender un pacto municipal para facer fronte ao atentado medioambiental.

"Este conflito está a durar xa máis tempo do previsto e estase somentendo á veciñanza a unha tensión innecesaria porque, non cabe dúbida, o proxecto de Toysal ten que ser, tarde ou temprano, un pasado para esquecer no concello de Teo", sinala a portavoz nacionalista Patricia Castelao .

A perda de control sobre a pista supón, para Patricia Castelao, "facilitar a Toysal que faga o que lle pete nos terreos e, fronte isto, estará o BNG e tamén as veciñas e veciños como levamos demostrando todos estes meses de protestas e mobilizacións para deixar claro que, de se construír, atoparíanse coa nosa oposición activa".

Para o BNG, a actitude da Xunta e do Concello ten que ser "contundente, poñéndose á fronte da situación en lugar de abrir novas portas a que a ameaza sexa unha realidade" polo que esixe "unha actitude firme, botando man de todas as posibilidades que existen para que o vertedoiro non se realice".

 

Un pacto municipal

 

Reclama Patricia Castelao, polo tanto ,que "todas as forzas políticas do concello se deixen na pel neste tema para intentar solucionalo por todos os medios, con responsabilidade, respondendo só aos intereses das veciñas e veciños". Ao seu ver, a notificación do cambio de titular catastral e rexistral da pista da canteira a nome de Toysal supón "poñer ao raposo a coidar as galiñas, é dicir, vía libre para meter na canteira o que sexa e sen ningún control".

Desta maneira, o BNG reclamará ao goberno do concello de Teo que "se implique de maneira activa para coñecer as condicións das posíbeis vías de negociación cos axentes implicados, a propia Toysal mais tamén a Dirección Xeral de Minas, que se fagan públicos os requisitos que están sobre a mesa para desbloquear esta situación porque os veciños e veciñas non merecen continuar vivindo esta presión durante tanto tempo".

"Desde o BNG estamos a facer unha oposición responsábel, construtiva e dialogante mais non permitiremos un novo golpe á veciñanza con noticias que só fan aumentar a alarma. Queremos unha solución urxente porque é xa moito tempo de tensión e é necesario que as institucións se impliquen en buscar unha solución. O vertedoiro só é negocio para Toysal e prexuízos para o concello de Teo, en especial, para as persoas máis afectadas que viven no entorno de Casalonga", sinala a concelleira nacionalista Patricia Castelao.

"Esiximos, antes que nada, respecto á veciñanza que vive con desesperación esta confusión e merecen vivir con tranquilidade", defende Patricia Castelao.

Lembrou tamén que o BNG levou o tema ao Parlamento Galego e ao Congreso dos Deputados e "non parará de defender a paralización do proxecto en todas as institucións xa que existen vías e hai que esixilas para que o vertedoiro non se instale en Casalonga".

Hoxe Patricia Castelao, voceira do bng de Teo, acudiu á xuntanza entre representantes municipais e o conselleiro de Sanidade, Julio Comesaña, onde se falou da creación dun novo centro de saúde na Ramallosa. Agardamos que este anuncio sexa o punto de partida para poñer fin ao deterioro e deficiencia dos servizos sanitarios de Teo e frene a “fuxida” de veciños e veciñas a centros de saúde da contorna, por non dispor en Teo de servizos sanitarios propios dun concello con case vinte mil habitantes.
Dende o BNG estaremos atentas ao devir do proxecto, xa que anunciar un novo centro non pode quedar só na construción dun novo edificio, se non que significa tamén concretar os servizos, medios e persoal cos que se vai dotar.
A no sa voceira aproveitou a xuntanza para lembrarlle ao goberno do PP na Xunta a necesidade dun Centro de Día no Concello.

Teo, 24/02/2022.-

O BNG apoia os orzamentos do concello de Teo "por responsabilidade" e anuncia que non apoiará ningunha moción de censura

A nova portavoz, Patricia Castelao, tomou posesión do seu cargo no pleno en que se rexeitaron as contas municipais

 O BNG de Teo decidiu votar a favor dos orzamentos presentados polo goberno municipal "por responsabilidade e polo ben da veciñanza que está a padecer as consecuencias dun goberno débil e inestábel", sinalou a nova voceira nacionalista, Patricia Castelao, que tomou posesión no pleno en que se debateron as contas municipais para este ano que foron rexeitadas cos votos do PP e o PSOE. 

"Non son os nosos orzamentos e gustaríanos un maior diálogo nun tema que é crucial para o futuro da veciñanza mais, mesmo así, por responsabilidade, decidimos votar a favor das contas presentadas polo goberno municipal", sinala a nova portavoz do BNG no concello de Teo, Patricia Castelao no seu primeiro pleno como concelleira. 

O BNG anuncia tamén que lamenta que o goberno presidido por Rafael Sisto, "teña que vincular os orzamentos a unha moción de confianza porque demostra a soidade do seu grupo que tenta gobernar cunha minoría insuficiente", polo que solicita "xenerosidade, diálogo e humildade para a defensa dos intereses da veciñanza que si que están vinculados aos orzamentos que son o verdadeiro programa de goberno dun concello". 

Neste sentido, Patricia Castelao anunciou tamén que non apoiará ningún intento, a curto prazo, de calquera iniciativa de "moción de censura porque estamos certas de que a alternativa será aínda peor, tal e como se demostrou na historia recente de Teo". 

O BNG quere deixar claro despois do acontecido no pleno celebrado este mércores que "os intereses primeiros están  na mellora das condicións de vida da veciñanza do concello de Teo, nuns orzamentos sociais e realistas, que non vendan fume senón que resolvan as urxencias da veciñanza" e, neste sentido, as dúas concelleiras comprométense a "apoiar as accións de goberno encamiñadas a reclamar melloras para o concello como estamos facendo co sistema sanitario ou de transporte e tamén a reunirnos as veces que faga falta para chegar a acordos para o ben de Teo". 

Advertiron, iso si, que "a situación do concello mudou con Son de Teo gobernando en solitario e iso ten que obrigar ao grupo dirixido por Rafa Sisto a tomar nota e ser dialogante, coa humildade que se precisa nunha situación de grande debilidade". Neste sentido, apuntaron tamén as nacionalistas que "polo BNG non se vai perder ningunha oportunidade para tomar decisións ou desenvolver accións que supoñan responder aos intereses e beneficios das veciñas e veciños de Teo”.